PISATICI LU GRANU PPI ME' MATRI di Romeo - Ciccimo Sineri - voce Armando Carruba

PISATICI LU GRANU PPI ME' MATRI

Era 'na vecchia matri
ccu' 'a peddi tirata supra l'ossa
campava sula, sula e attimurata,
aspitannu di jnchiri 'a fossa,
senza cchiù nuddu disiu, rassignata.

Tanti e tanti voti,
visitannu lu vecchiu sposu mortu,
taliava la so' ultima dimura
e 'ntrà la gioia e lu scunfortu
pinsava: prestu veni la me' ura...

Senza rabbrividiri, supra la fossa,
ccu' l'ussuta mani
'a terra accarizzava chianu chianu...
e suspirannu dicìa:
Chista, chista è la vera casa mia,
l'unica cosa ca nun pozzu dari!

Pirchì la robba, la casa e li dinari,
ancora in vita ci l'avia dunatu,
all'unicu so' figghiu affiziunatu;
e spugghiatu s'avia di l'usufruttu,
lassatu da lu vecchiu sposu mortu.

E 'stu figghiu, c'avia avutu tuttu,
ora, cchiu' ppi duviri ca pp'affettu,
ppi sustinilla 'a ricumpinsava
dannuci granu...
Sì, ma ci lu pisava!
E sì... ci lu pisava!

E ci diceva, tutti li voti ca idda ci jeva:
"Pisatici lu granu ppi me' matri!"
"Ohu.. pisatici lu granu ppi me' matri!"
Propriu accussì lu figghiu ci diceva
a tutti li so' figghi e a la mugghieri,
mentri la vecchia in pettu si sinteva,
a pezzi, a pezzi tagghiari lu cori !

Pisatici lu granu ppi me' matri, pisatici...
Madonna chi cunnanna!
Binidittu mi sì, figghiu aduratu
binirittu mi sì, Diu sia ludatu,
ma tuttu chiddu ca ju t'haju datu,
l'haju pisatu ju? l'haju pisatu?

Tutta la gioia, l'amuri, l'affettu
i rinunzi, i sacrifici, lu me' ciatu,
'u sangu miu, lu latti di lu pettu,
l'haju pisatu ju? l'haju pisatu?

Nun c'è vilanza no, nun c'è stadia
ppi ccu è matri, matri comu a mia!
Pisatici... Pisatici... Oh granni Diu
nun ci l'aviti a scriviri a piccatu,
e se piccatu c'è, lu tortu è miu,
e scuntu ancora, se nun l'haju scuntatu.

A mia la pena, Diu Onniputenti,
a iddu no, a me' figghiu nenti!
A iddu nenti... nenti!

ROMEO - CICCINO SINERI 

Santa Sofia a Sortino di Armando Carruba

'U deci sittembri, festa granni a Sciurtinu ppi Santa Sufia; è una dde' cchiù antiche festi riligiusi dda' Sicilia.
'A prima vota fu 'ntò 1538, quannu cca' bolla ddo' Papa Paulu III, Sufia vinni fatta Santa e Patruna 'i Sciurtinu.
'A storia 'i Santa Sufia si parti 'ntò seculu secunnu d.C. 'ntò tempu bizantinu. E ccu Santa Sufia s'ammisca storia, mitu, liggenna e tradizione. Si dici ca Santa Sufia, ha campatu 'a so' brevi vita 'nta ddi posti. Discinenti 'i 'na famigghia pagana si cunvirtiu 'o cristaniesimu e ppi chistu pajò cca' vita, ppi opira ddò 'mpiraturi Custanti.  
Da 478 anni si fa festa tutti l'anni! All'unnici ddo' deci sittembri, 'u simulacru 'i Santa Sufia s'affaccia 'ntò sacratu: 'A bedda "sciuta". Dopu ca s'hanu vinnuti i riali all'asta, 'u sparari di tanti mortaretti 'ntà nu spittaculari jocu i focu, raffiche 'i "zavareddi" e le marce musicali dda banna precedunu 'a prucissioni dde' devoti, ca portano 'a Santa a spalla, le vare e la Reliquia.... W SANTA SUFIA !

SIRACUSA - PIAZZA PANCALI di Armando Carruba

A finuta ddo' Rettifilu (Corso Unberto l) si trova 'u ponti umbertino, e na vota ca si passa si trasi in Ortigia! Eh 'na vota c'era 'na gran bedda porta spagnola ca oggi si po' vidiri 'ntà qualchi foto vecchia.

'Sta porta fu jttata 'n terra 'ntò 1892 e 'u stemma 'i mammuru è sabbatu 'o museu.

'I ponti ppe' picciriddi era nu spassu, spissu si firmavunu a taliari 'u mari dda' i spaccazzi.

Quannu cala a sira si ddo' ponti taliati 'u mari ddo' porto granni, v'addunati ca 'a luna joca a muccia muccia ccu l'unni do' mari ca ccu ducizza annacunu i varchi attraccati 'o molu.

Piazza Pancali pigghia u nomu da  Emanuele Francica, barone di Pancali (1783 - 1868) uomo precisu,  patriota liberale, fu dda' massoneria e misu a capu dei picciotti liberali sarausani per 'a so' spirtizza a ammucciari i movimenti dde' cuspiraturi.

Fu sinnacu 'i Sarausa 'ntò 1837.

'Ntà 'sta chiazza si pò taliari 'u tempiu d'Apollo, 'na costruzioni  ddo' 565 a.C. 

A chiazza Pancali 'ntà l'albiri c'abitanu tanti passareddi e se pp''n mumentu chiuri l'occhi, cca' fantasia vidi ddu beddu cafè da Posta e i varchi ca facevanu viaggi dda' burgata ppi nun parrari dde' chioschi ca vinnevunu tutti di bibite cularati o l'acqua seltz.

A Catania 'sti chioschi turnaru da tempu di moda,  a piazza Umberto a CT si nni trova uno ddo' 1800.

Ma i nostri a Piazza Pancali non scherzavano,negli anni cinquanta producevano tante bibite multicolori e dissetanti, e tante caramelle dei poveri: i bomboloni.

Pippo Lantieri, gestore all'epoca di un bel chiosco ne faceva di bomboloni, lui era buono come i bomboloni che produceva, ed è ricordato dai siracusani di una certa età come l'uomo della pace giacchè finchè visse portò questo meraviglioso messaggio d'amore in giro per il mondo ai potenti di quegl'anni.

CAVURU! MA CAVURU! di Angelo Giurintano

Sul GIORNALE DI SICILIA negli anni  '70/80 furono pubblicate una serie di poesie in dialetto, eccone una di Angelo Giurintano:

CAVURU! MA CAVURU!

Cu cerca vasca o pilacciuni
la genti scosci ed è mpitrita
cu tanta forza u suli liuni
a puvireddi ci livà a vita.

Si ribillà cà sta natura
pensu, l'omu avissi di miditari
accarpa tutti cu st'arsura
tanti chianti fici siccari.

Ntò lidu cerchi la friscura
facennu tant'usu du mari,
ma, nta li spiaggi c'è la calura
quannu torni stà asciatari.

Vivi tant'acqua e t'abbuturi
grossu palloni si', di scuppiari
mentri ti sculanu i suduri
ti cerca l'amicu, t'avà parrari.

Di tia voli la risposta,
ancora un cci l'avii datu,
accinnasti chi facisti sosta
lu gran cavuru t'affaticatu.

Preji li santi chi resti vivu,
di sta calamità naturali,
di forzi 'ntà lu corpu si' privu
stannuti aggiazzatu 'ntò canali.

Comu porcu  strichi 'nta lu fangu
circannu posti di friscura
pari coppia chi balla lu tangu
'ntò mentri a peddi si fa scura

Fa la crusta comu lu crastuni
pinsannu di putiri campari
vulennu acchianari lu scaluni
t'addunasti ca nun u po' fari

Sciddicannutinni cchiù nfunnu
e ddà stissu curri a lu riparu
capisti ca chistu è lu munnu
campari havi costu troppu caru

E ti levi la crusta di lu corpu
capennu sulu chi stà scucennu,
ppi campari ti disiassi purpu 
e 'ntà lu mari t'innissi 'nfunnu.

Angelo Giurintano

CUCCHIUTA DIFFIRINZIATA di Armando Carruba

Dicunu tutti da chi munnu é munnu
ca cche' nummiri nun c'è mai 'nu sbagghiu,
ppi cui, ai all'annu di la munnizza
cincucentu chili all'unu si jetta
prima ca ccà finisci a paghiazzata
ci voli 'sta cugghiuta diffirinziata.
S'accatti n'elettrica apparecchiatura
la vecchia ci la duni a la putìa
ca d'obbligu ppi subbitu s'ha pigghiari
e ppi giusta liggi l'havi à smaltiri.
Hamu à jttari cchiù picca e megghiu
ora ti lu dugnu ju qualchi cunsigghiu.
Quannu allegramenti fai la spisa
nun pigghiari a muzzu; fai 'na cosa 
afferra cosi semplici ppa' to' casa
preferisci i prodotti cuncintrati
e robba fatta ccu cosi riciclati,
e li cuntenitori ca sbacantati
ci l'ha turnari a ccu ti l'ha vinnuti.
Pigghia li cosi, tipo usu famigghia,
e non chiddi con scrittu "usa e jetta"
ritorna a la to' sporta 'i 'na vota
e scancella li sacchetti di la spisa!
Chi cosa tu metti 'ntò cuntenitore?
tu dicu sempri ju 'ntà ddu paroli:
Scarti 'i cucina, avanzi 'i manciari,
li scocci d'ovu, frutta e li virduri
piatti, bicchieri plastica, filtri i té
i ciuri, pani duru, funni 'i café;
nonzi stracci, carta patinata nenti,
pupù 'i cani, jattu e assorbenti.
'Ntà lu postu dda' carta ci ponu stari
scatuli di pasta, libri, e cartuni,
quaterni, rivisti, fotocopii, giurnali...
mentri macari cca' ppo' azziccari
nylon, fazzuletti lurdi, pergameni.
Li cosi ssu tanti, ppi sapiri di cchià
di lu guvernu puntu it fai 'u www.
Forsi ca facennu bona 'sta cugghiuta
'ntà la bulletta ni calanu la spisa...
o "sonnu Catarì", ca l'aria è duci
pirchì c'è cu l'aumentu ni lu fici;
ma ssi un populu si vidi dda' munnizza
forza picciotti! Mittemuci 'na pezza!

Armando Carruba

L'AMURI di Nino Martoglio (commento di Armando Carruba)

L'AMURI di Nino Martoglio

Tutti conosciamo questa poesia, postata e ripostata tante volte, desidero commentarla, dato che Nino Martoglio le sue poesie 'i pitta precisi precisi.
Partiamo dal fatto che all'inizio del secolo scorso, nun è ca tantu si puteva parrari di sesso in famiglia, o domandare pirchì, come dicono oggi, si hanno "la farfalle nello stomaco!" NOOO... quindi immaginiamo una ragazzina presa dall'amore prendersi di coraggio e domandare:

– Mamma, chi veni a diri 'nnamuratu?

A stu puntu, ipso fatto, la mamma da se medesima si domanda tre domande: CHI FU? CHE ACCADDE? SA CCHI SUCCESSIII ??? Ma facendo l'indifferente dice e non dice...

– ...Vôldiri... un omu ca si fa l'amuri.

E nun ha ditto nenti di nenti! Idda vuole sapere dell'amore oh binidittu San Pasquale protettore dei cornuti! e domanda a sua volta...

– E amuri chi vôldiri? –

Benigni è stato un grande a descrivere i DIECI COMANDAMENTI specie quel "Non commettere atti impuri" come da ragazzini ci raccomandavano e quindi la mamma ribatte...

... È un gran piccatu;
è 'na bugia di l'omu tradituri!

'A picciridda, ca havi i farfalli 'ntò stomacu... a morti subitania rispunni:

– Mamma... 'un è tantu giustu 'ssu dittatu...
ca tradimenti non nn'ha fattu, Turi!

Ferma papuri!!! Turiddu! Analizziamo ccu jè Turiddu... Turiddu per fare un esempio e' chiddu, ca mintemu a carusa dumanna a so matri il permesso di passiari a chiazza? la mamma dice NO ci dice che ci va con l'amica,, la mamma dice NO dice che l'accompagna Turiddu, la mamma dice SI eccu cu è Turiddu! il bravissimo ragazzo e ora... 'stu gran figghiu bip bip e sussurra..

– Turiddu?... E chi ti dissi, 'ssu sfurcatu?

Sfurcatu tradotto in lingua è "pendaglio da forca".. viditi come da bravo ragazzo si passa a pendaglio da forca!!! e la picciotta presa da quelle farfalle dice con enfasi e sentimento...

– Mi dissi... ca pri mia muria d'amuri!

Quannu è accussì ì cosi cchè cosi e i ciaramidi cchè casi si pò discutiri no?

– Ah, 'stu birbanti!... E tu, chi ci dicisti?...

– Nenti!... Lu taliai ccu l'occhi storti...

– E poi ? – Mi nni trasii tutta affruntàta!...

– Povira figghia mia! Bonu facisti!

E... lu cori? – Mi batti forti forti!...

– Chissu è l'amuri, figghia scialarata!

NOTA - Visto poi quannu c'è l'accordo c'è l'amuri e tuttu fila liscio senza bisogno di spiegazioni? (Nun ci fati casu 'a mia mancanza di chiffari fu) Bona jurnata!

PATRI DI LA ME' VITA di Anita Popolo

La notizia della sua dipartita ci ha colti impreparati, una brava poetessa e un esempio di vita.




PATRI DI LA ME' VITA

Sentu rintra di mia
comu na vuci antica
sentu 'a ninna nanna
e poi lu nomu, Anita!?!
Si turnatu ancora
patri dda' me' vita?
vulissutu jucari ccu mia
comu na vota?
La vita passa lesta
lu munnu s'arrivota,
li patri sunu figghi,
mai s'arresta 'a rota.
Vurria putirti dari
lu zucchiru filatu
viririti filici
aviriti o' me' latu.
Sulu rucizzi e tanti,
vurria putirti dari
prutiggiriti e amari
... po' cuntu pariggiari.
Anita Popolo Lentini

PADRE DELLA MIA VITA - Sento dentro di me/ come una voce conosciuta/ sento la ninna nanna/ e poi il mio nome, Anita!?!/ Sei tu tornata a vita (di nuovo)/ padre della mia vita?/ vorresti giocare con me/ come una volta?/ La vita passa in fretta,/ il mondo si sovverte/ i padri diventano figli/ non si fermerà mai "questa" ruota/ Vorrei poterti offrire/ lo zucchero filato/ vederti felice/ e averti ancora al mio fianco/ Solo dolcezze, e tante/ vorrei poterti dare/ proteggerti e amare/... per pareggiare i conti.