SARAUSA

Ti portu sempri dintra 'u cori

vecchia e cara Sarausa

circundata da lu mari

terra duci e ginirusa.

Ju nascii 'nta lu scogghiu

unni c'è Santa Lucia

quantu beni ca ti vogghiu

cara e vecchia Ortigia mia.

Ju nascii unni lu mari

canta sempri li canzuna

e li vecchi assittati

arricugghiunu pinzeri.

Picciriddi ca jucavumu

scappannu ppe' vaneddi

cche' matri ca chiamavanu

cco' scuru era a feddi.

E cco' scuru di la notti

'nta st'isula amata

si sintevanu li tocchi

ddo' 'rrologgiu 'a 'Mmaculata.(1)

Nun vi pozzu mai scurdari

casi ddo' quarteri miu

e ci vegnu a passiari

pirchì è forti 'u disìu

di quann'era picciriddu

ccu ddì vuci di me' matri

arricogghiti curnuteddu

prima ca veni to' patri

Me' patri quannu vineva

ci bastava 'na taliava

nun 'u sacciu comu faceva

mi liggeva 'a jurnata!

alfeo

(1) l'orologio della Chiesa dell'Immacolata a Siracusa è famoso perchè non segna mai l'orario giusto; quindi per dare del ritardatario a qualcuno si usa dire: ssì comu 'u 'rrologgiu dd''Mmacculata!