A li tempi ddi l'Ebbrei l'ultimu jornu di cannaluvari era di sabbatu. 'Na vota un picuraru avìa un caprettu 'ncoddu e si java a fari l'ultimu jornu a la sò casa. 'Ncontra e 'ncontra a lu Maistru. Dici lu maìstru:
- Unni vai, bon omu?
- Vaiju a fari l'ultimu jornu a la me' casa; ca lu patruni mi detti 'stu caprettu, e mi lu vogghiu manciari ccu la me' famigghia.
- E chistu nun è l'ultimu jornu? Chi ci vai a fari?
- E bonu; mi nni pigghiu nautri dui, e macari tri.
- Ti sianu cuncessi; e chissi vanu ppi tia.
E picchissu l'ultimi jorna di cannaluvari si diciunu li tri jorna di lu picuraru.
Nessun commento:
Posta un commento