POESIA SICILIANA - LU SURCI E LU RIZZU di G. Meli

LU SURCI E LU RIZZU
Giovanni Meli

Facìa friddu, ed un surci ‘ngriddutizzu
mentri stava 'ntra la tana ‘ncrafucchiatu,
senti a la porta lamintari un rizzu
chi ci dumanna alloggiu, umiliatu:

"Ju, dici, ‘un vogghiu lettu, né capizzu;
mi contentu di un angulu, o di un latu.
O mi mettu a li pedi ’mpizzu ‘mpizzu,
basta chi sia da l’aria riparatu”.

Lu surci era bon cori, e spissu tocca
A li bon cori agghiùttiri cutugna;
su’ assai l’ingrati, chi scuva la ciocca!

Trasi lu rizzu, e tantu si cc’incugna
Chi pri li spini lu surci tarocca,
e dispiratu da la tana scugna:

e di cchiù lu rampugna
l’usurpaturi, e jia gridannu ancora:
“Cu' punciri si senti nèsci fora”.