ORTIGIA MIA di Neli Seguino

ORTIGIA MIA

Passatu è 'n annu e m'hanu parsu centu
ca nun ti videvu cchiù Ortigia mia
vacanti lu me' pettu ancora sentu
pirchì lu cori lu lassai a tia.
Ora ca sugnu cca' ccu tantu amuri
mi vogghiu didicari tuttu a tia
vogghiu passari 'n paci tutti l'uri
di la matina anzinu l'Avimaria.
Vogghiu sustari spissu a la marina
sintiri li canzuni di lu mari
e dill'aciduzzi musica divina.
Quannu ripartu e vadu a la stranìa
lu cori miu ti vogghiu ridunari
pirchì ti amu Sarausa mia!
Ti amu firtili terra ginirusa
ca chianciri mi fai di nustalgia
ti penzu sempri amata Sarausa
e soffru tantu di malincunia.
Isula ca m'ha datu li natali
m'attiri comu fussi calamita
la luntananza mi fa tantu mali
e mi turmenta l'esistenza a vita.
Terra mia tuttu amuri e puisia
ogni criatura tò ti divi amari
ccu tuttu 'u cori 'nzinu 'a fuddìa.
Ciuri ca ssì sbucciatu 'ntà lu mari
lu focu ca mi cuva 'ntà 'stu pettu
è tantu ardenti ca nun si pò stutari.

Neli Seguino