CONTRO OGNI VIOLENZA SULLE DONNE di Santo Grasso

CONTRO OGNI VIOLENZA
ANCHE PER LE DONNE BAMBINE.

Priera d’un patri

Oh granni Diu ca in ogni locu stati
e li fatti du munnu li viditi,
iu v’addumannu si pi caritati
stu patri ‘npena vui lu succurriti.

Chista priera a vui, Divinitati,
ca iu vi fazzu cu lu cori ‘nmanu,
è pi me figghia, ca mòvi a pietati
ca mancu pari chiù n’èssiri umanu.

Havi lu corpu chinu di firiti,
l’arma e lu cori l’havi addulurati,
li so’ carnuzzi sunnu dinutriti,
l’occhi sempri di lacrimi vagnati;

nun voli mancu l’acqua, mori ‘i siti,
chianci tutti li jorna e li nuttati,
dàtici aiutu vui, siddu vuliti,
sarvàtimmilla vui, dd’occhi fatati.

Era comu ‘na rosa a lu sbucciari,
rigina bedda di tutti li ciuri,
megghiu nun la putìa appitturari
mancu lu re di tutti li pitturi.

Havìa tridicianni sulamenti,
l’età da carusanza spinzirata,
quannu ci sù li sogni nni la menti,
filici pi la prima “taliàta”.

Ma gnornu malidittu, tempu nenti,
la malasorti fici’a ‘mpruvvisata:
si la rubbaru certi mala genti
e senza pena vinni viulintata.

Ora si senti spersa comu a mari
è ‘na varcuzza senza lu timuni,
è n’acidduzzu ca nun po vulari
cu l’ali rutti misa ‘nti ‘na gnuni.

A còllira mi fa lu sangu amaru,
e chiù ci penzu, chiù staju ‘mpazzennu,
pirchì la figghia mia mi la canciaru,
di riginedda a pupa senza sennu!

Quarcunu dici, ca è cosa ‘i nenti,
pi stupru, nuddu vèni cunnannatu,
perciò dda maniàta ‘i dilinquenti,
ponnu stuprari, ca nun è riàtu.

La me spiranza Diu, si m’ascutati,
è ca faciti a l’omu la murali:
di mèttiri lu frenu a sti dannati,
firmari da viulenza la spirali.

Sugnu cunvintu ca l’umanitati
nun è tutta accussì, e menu mali!
Pirchì s’allura, vui mi pirdunati,
è megghiu ‘a cunvivenza cu l’armali!

Santo Grasso