NUVEMBRI di Giuseppe Nicolosi Scandurra

NUVEMBRI

Nuvembri all'usi soi stampa disigni
mentri la notti l'umbri s'arricogghi;
girunu certi negghi a li so vogghi
ca 'nfrunti all'arba parunu russigni.

Ora la terra cuva li simigni,
qualchi ventu malevuli si strogghi;
pigghiunu sonnu l'arvuli e li fogghi
gialinizzi si formunu, murtigni.

Li macchi surdi, li muti muntagni,
li niuri sciari, guardanu lu mari
ca jucannu jucannu spinci l'unni.

Lu suli si scianchia 'ncagnatu pari,
dormunu nudi, duri li campagni,
l'ecu non cogghi nenti e non rispunni.

Giuseppe Nicolosi Scandurra