SIRACUSA di Nino Marzà

Nino Marzà, catanese (1931-2006) si è rivelato poeta nel 1976, con il volume Spizzichi di suli.

SIRACUSA
In ogni parti di munnu,
nun c'è storia
ca uguagliari putissi
chidda to,
Siracusa!
Na lu to ventri
nutricasti li fatti cchiù impurtanti
ca sirveru d'esempiu.
La tirannia
di Jeroni e Diunisiu,
lu 'ngegnu supraffinu
d'Archimedi.
L'amuri ca purtau a li to' pedi
l'Apostulu San Paulu.
La luci di Roma
addumata eternamenti
dintra lu to mari.
Lu sacrificiu ca nun poi scurdari
d'Aretusa!
Dintra li to' stratuzzi
vidu ancora
l'ogghiu caudu culari
supra li testi di li saracini,
lu stissu ogghiu
cu virtù divini,
ca dava l'ultimu salutu
a li to' figghi
c'avianu difinnutu
la fidi cristiana!
Siracusa,
città di li papìri
unni scrivisti storia!
Storia di guerra, di scenza e paci.
Storia d'amuri,
la to' storia
Siracusa!
Nino MARZA'

(da Poeti Siciliani Contemporanei a cura di S. Camilleri)