'U RAGIUNAMENTU dalla Centona di Nino Martoglio

'U RAGIUNAMENTU

('ntra lu chianu di lu Spiritu Santu)

– Ora 'a dicìri Puddu Supprizzata:

Scusati, don Puddu, un cumanneddu...

– Eh, scuccazza d'amici!... 'A dichiarata

finìu? Chi è ? sarvàtivi 'u cuteddu!

–  Sintiti, a mia, oggi o' jornu a' jurnata,

m'arrispettanu, sugnu un picciutteddu

chi m'haiu fattu quarche sirinata...

– Basta, 'u sapemu, aggiùstati 'u cappeddu!...

– Pricchì, ci fussi quarchi cascittuni ...

cca 'mmenzu? – Bonu! senza quadiari...

e parra picca! – Cocimu Balluni,

varda, oggi, a tia... mannaja la galera!...

– Ti dissi ca 'nt'o'chianu 'n'ha' a abbaiari...

cca arreri sugnu..., a punta 'e cantunera!

Note. – (Nel ragionamento della Maffia si riunisce, spesso sul luogo stesso dove insorge la questione fra due o più maffiosi, una specie di corte d'onore, che decide seduta stante) – Dicìri (Decide) – Supprizzata (soprannome di Puddu) – Un cumanneddu (nel gergo: una preghiera) – Scuccazza (nel gergo: ascolta) – Dichiarata (dichiaramento) – Sarvàtivi 'u cuteddu (frase caratteristica del gergo, per dire: discutete con calma) – Oggi 'o jornu 'a jurnata (oggigiorno) – Sirinata (nel gergo figurato: tirata di coltello) – Cascittuni (nel gergo: vigliacco) – Senza quadiari (senza riscaldarsi) – Picca (poco) – Mannaja (mannaggia) – Abbajari (nel gergo: vociare senza profitto, fare il petulante).