Lassu a varba a un scappuccinu
ca cci servi ppi scuparinu;
o pramenti a un manuvali
ca cci servi p'allattari.
Lassu i capiddi o varbirieddu
si ni fa un beddu pinzieddu.
Lassu a casa e lu tirrinu
(chissu si sa!) a nu parrinu.
Li vureddi a li massari
ci siervinu pi cordi i carricari
Lassu a méusa a Don Papé Aprili
sa bbagna no sali e cci vivi!
U cularinu a li viddani
si lu cuocinu cu i favi
Tutta a panza si la vò
ju la lassu a Don Ciaciò
Lassu i peri a Cicciu 'u Zoppu
ca camina sempri a croccu
Lassu u fichitu cu purmuni
a Turi u Niuru cicaluni
l'arrimina na patedda
e s'u vinni un sordu a fedda
Li cacati a li scarpari
ca cci siervinu pi 'ncirari
La curata sana sana
ju la lassu a la mammana.
Chisti aggenti su 'nzignati
sempri scippunu curati
Lassu a testa cu i corna tisi
a tutti i Pasquali ro paisi
E criati ci lassu i buttuna
i 'nfurraccinu e patruna;
o puramenti a Mastru Iacintu
si fa stasira u sucufintu.
Lassu i dienti all'esatturi
ca n'arrussica tutti l'uri
Lassu a lingua cu rraricuni
a qualchi avvucatu ciacciaruni
Lassu all'urtimu u strumientu
e sbirri ca fanu pignuramentu!
(da Giuseppe Bonafede (Zù Rusà) U DUTTURI PRUVULAZZU - Utopia edizioni RG pp 134-136
Nessun commento:
Posta un commento