LA PALUMMEDDA JANCA (popolare)

LA PALUMMEDDA JANCA

Prijau, prijau, prijau;
ma nenti cuncirtau
ccu lu tirannu re,
tirannu re, tirannu re.

La palummedda janca
suffrìu, suffrìu, suffrìu;
all'urtimu rumpiu.
Nun potti stari cchiù,
nun potti cchiù.

Li dudici jnnaru,
jurnata di valuri,
sparmau li tri culuri,
vosi la libertà,
la libertà, la libertà.

Vinniru li surdati
ccu baddi e ccu cannuna:
ci desinu li pruna,
spareru, e 'un vennu cchiù,
nun vennu cchiù.

La palummedda janca
Diu la crijau rrigina;
'nsignata a la catina
la palummedda 'un c'è,
nun c'è, nun c'è.

La palummedda janca
non timi li furcuni;
non vosi cchiù Burbuni,
lu dissi, e accussì fu,
accussì fu, accussì fu.

La palumedda janca
manteni la parola,
Burbuni nesci fora,
e nun ci trasi cchiù,
nun trasi cchiù.

La palummedda janca
si voli maritari;
ma prima s'ha cunzari
lu nidu a vogghia so,
a vogghia so, a vogghia so.

Cci ha fari lu cuntrattu,
prima lu Parramentu
lu spusu, s'è cuntentu,
veniri allura po,
allura po, allura po.

Piu Nonu binidici
la Bedda ca zzitia;
fora la tirannia
viva la libertà.

12 gennaio 1848