VECCHIA MARINA di Antonino Tesoriere

VECCHIA MARINA

Oggi chi l’arma mia è cchiù scueta
E mi veni la vogghia di gridari
Pensu ch’è megghiu fingimi pueta
E sulu pi tia mettimi a cantari.

E mi ci provu pi tia Casteddammari
E pi li fimmini tò, pi li tò sciuri!
Pi li tò rutti, pi li tò Tunnari
Pi li tò pisci e li tò marinari.

Chi su in continua lotta cu stu mari
Chi certi voti è tantu ginirusu
E tantavutri ci dà vuccuna amari
Specie se bruttu, scuru e timpistusu.

Eppuru tutti ti vulemu beni
Sia che tempu beddu di bunazza
Chi in lontananza si senti li sireni
E si vidi lu scogghiu e la puntazza.

Sia chi lu tempu è bruttu e a la marina
La mariggiata superba e malandrina
Rumpi scuggheri, rumpi la banchina
E poi ritorna a la vasca Reggina.

Chi tempi beddi quannu a la marina
appena sagghiati li varcuzzi
vinnianu vivi vivi li trigghi a la marina,
li sardi, la nunnata e li mirruzzi.

Ora però li tempi sù canciati,
ora la pisca è divintata un mbrogghiu,
ora li pisci sunnu cungilati,
ora un c’è cchiù dda gran trigghia di scogghiu.

E un ci su cchiù li rizzi e li pateddi
e mancu lu zu Ciccu c’abbanniava
c’un panaru a lu vrazzu di sicci e purpiteddi.
Vi vogghiu a tantu. No! A tantu, e si pattiava.

E dunni su cchiù li piscatura
e dunni su cchiù li vicchiareddi,
chi assettati a lu friddu e la furtura
tissianu sempri rizzi e nassiteddi.

E dunni è cchiù Raisi Ciccu Sarcona,
e Raisi Cola e Raisi Giuvanninu,
tutta genti valenti, genti Bona!
Armuzzi bianchi comu un Gersuminu.

Eppuru ancora ti po’ capitare
na vecchia varca chi pisca sularina
versu scupeddu o versu lu pirali,
chi ti ricorda la Vecchia Marina.

Antonino Tesoriere

Antonino Tesoriere figlio di Damiano e di Antonina Foderà
Nato a Castellammare del Golfo il 12.11.1908 - morto a Roma il 27.11.1980