POETI SIRACUSANI IN VETRINA - Letterio Cafeo -

PINSERI RI CUNTADINU

Oh terra mia! (rici u’ cuntadinu)

quannu mi movu e i supra ti caminu,

sugnu filici, si chistu è ristinu

travagghiu, ma di gioia sugnu chinu.

Terra! Iù ti succhiu e ti siminu,

mentri ti zappu tutta ti riminu,

sentu la to’ friscura assai vicinu,

quannu su’ stancu e suru a capu chinu.

Passai la me’ vita a travagghiari,

cottu ro’ suli e i caddi nta li mani,

sempri cuntentu, senza mai pinsari

(comu cu’ rici) “chi vita ri cani!”

terra, terra mia! Tu mi fai campari,

iù ri rugnu u’ cori! Tu mi runi u’ pani.

Letterio CAFEO