Come m'avete richiesto, ecco la versione scritta e recitata della bella poesia del poeta siracusano Giuseppe Barbagallo.
'A MATALOTTA A' SARAUSANA
Quattru su 'i cavaleri ri l'apocalissi
quattru, i spuri pi fari l'agghiotta:
chista è a rizzetta ca me nanna scrissi
e la chiamò ri nomu matalotta.
Ri puddhisinu 'n pocu a ta pigghiari,
ri 'na tistuzza poi du' spicchia r'agghiu,
'a chiapparedda, chidda 'n ha mancari,
e assemi o pumaroru 'n pocu r'ogghiu.
'Nta 'n tianeddhu 'i crita ora mittiti
'u puddhusinu, l'ogghiu, agghia e chiappareddha;
a focu lentu poi li sufriiti,
arriminannu tuttu cu 'na cucchiareddha.
E quannu l'agghia ha addivintatu r'oru,
alleggiu alleggiu junciti 'u pumaroru
e mentri chistu coci 'nt'a tirrina,
priparati quattru pezzi ri tunnina.
Ri sali ni mittiti quantu abbasta,
mentri ch'a parti priparati 'a pasta
e 'u tunnu a cociri 'nto 'ntrugghiu
menz'ura ancora dopu 'u primu vugghiu.
Pronta è la pasta 'nta tavula purtata
cu ddha gran matalotta, arriminata;
l'ultimu coppu mittemu 'n cucchiarinu
ri lu nostru furmaggiu picurinu.
S'ha dittu sempri ca 'u megghiu sapuri
e chiddhu aruci aruci ri l'amuri;
ma ravanti a 'n piattu ri sta sorta
lassu l'amuri e pigghiu 'a matalotta.
Giuseppe Barbagallo
Nessun commento:
Posta un commento