RIFLISSIONI di Maria Agrippina Amantia

RIFLISSIONI

A tutti dicu sempri, forza, riditi!
la vita è sulu una, nun chianciti,
jiu li me affanni li tegnu sarbati,
all'amici ci li tegnu ammucciati.

Maliditti chisti tempi di malura,
nenti travagghiu e chini di dulura,
ma se haia essiri daveru sincera ,
nun ci la dugnu vinta a jiettatura.

Mostru tutti li jiorna la dintera
a stu munnu chinu di malavintura,
cu lu risu affruntu la sfurtuna,
spirannu ca si sdigna e s'alluntana.

Quannu jinchiu la sporta e la misura,
m'inni vaiu 'n campagna sula, sula,
mi mintu a fari juci finu a sira,
tutti li me larmi, jiu li jettu fora.

Allura taliu tutta la natura,
taliu lu cielu, li stiddi , puri la luna
rifliettu e dicu, c'haiu la furtuna,
ca lu Signuri la vita m'a culura.

Taliu li sciuri, li muntagni e lu mari,
a quantu genti, hannu vistu passari,
semu nuddu ammiscati cu nenti
nveci di ridiri nu picchiuliamu sempri.

maria agrippina amantia