LU ME' RIPUSTEDDU di Francesco Guglielmino

                                                 l'attore  Armando Carruba

                                          

'U mè ripusteddu

'Ntra la mimoria mia c'è 'n ripusteddu
unni ci sarbu li così chiù cari
e la chiavuzza la portu d'incoddu
comu non fazzu mai ccu li dinari.

Quannu mi sentu - e ci sugnu suggettu -
malinconcunusu o menzu siddiatu,
apru, scarminu e nesciu qualchi oggettu
ca m'arricorda lu tempu passatu :

Cercu ddi littri ca t'arriturnai,
doppu ca li 'nzingai d'intra la menti,
dd'uri filici. .....e comu li scuntai
quannu cangianu li tò sintimenti;

Tutti ddi paruleddi ca dicisti
cu l'ura, la jurnata e anchi lu puntu. ....
comu vardavi, comu m'arridisti
na ddi mumenti ca mi davi cuntu.

Cercu li jochi di la carusanza
( Lu megghiu tempu ca non torna chiù! )
Li primi strammarii, l'amurusanza
pri ' na figghiola ca. ....non eri tu.

Cercu - ma Allura mi scappa lu chiantu -
li carizzeddi di la matri mia,
la viu com'era cu mè patri ' o cantu. ....
poi chiudu, ca la testa mi furria.

Francesco Guglielmino

Da : Ciuri di strata