SCAMPAGNATA DI LI ME' TEMPI di Maria Agrippina Amantia

SCAMPAGNATA DI LI ME' TEMPI

Ddu jiuornu ni susemmu cu lu scuru,
ca li jiaddi durmievunu ancora di sicuru.

Me nanna priparò tuttu l'occurrenti,
pensu ca nun si scurdò propriu di nenti.

L'ova no panaru, a farina na lu saccu,
i buttigghi di la sarsa e lu vinuzzu.

I gilippati, u turruni, u benvuliri,
e a santa cruci prima di partiri.

Nuatri picciriddi nun capivumu nenti
c'era sulu aria di fistiggiamenti.

Currievumu cas, casa,comu mpazzuti
erumu tutti nun pocu stralunati.

Arrivò lu mumentu di la partenza,
a mia e me frati 'acchipparru cu veemenza.

Uno di cà e unu di ddà,
dintra du cufina, comu du pascià.

Supra li scianchi di lu mulu,
ca mentri caminaumu parieva c'abbulaumu.

Ridieumu comu du sfasati,
nun pocu pi prieiu, nun pocu scantati.

Quannu arrivammu, dopo na bona menz'ura,
di scinniri nun ni parsi l'ura.

Me nannu, ni cunsò la naca cu la corda,
a nun peri d'aliva ranni ranni.

Sicuru si potti priari,
di quantu scutuliati c'appumu a dari.

Intantu, cu tantu preiu,
ddi fimmini tutti, si misuru o furriu.

Cu facia lu sucu , cu mpastava farina,
erunu tutti dda, ni la tannura.

Li masculi cchiù ranni s'inni eru,
a cogghiri pali ri ficurinni e si spinaru.

Si passavunu li cutedda ni li manu,
pi livarisilli ma era vanu.

Siccomi nun c'arriniscevunu,
cu sa scusa li fimmini chiamavanu.

Appena fu tuttu pronti, fu festa ranni,
a maidda s'inghì di cavateddi,
beddi, cauri e fumanti,
c'avevanu a saziari tutti quanti.

C'eranu puri chiddi schifiusieddi,
ca nun vulievanu mangiari nsiemula a tanti.

Me nanna, ci li misi dintra na pala,
di ficurinna,
a forma di piattu cu la ncavatura.

Cavateddi e sucu ci fu, pi tutti,
ranni, nichi e puri picciotti.

Caciu picurinu a vuluntà,
vinu sinceru ch'era na buntà....

Ballati, friscaletti e tarantelle,
risati, e puri tanti vasateddi.

Cosi ca rallegrunu lu cori,
comi si pò campari,
senza amicizia e amuri?

Maria Agrippina Amantia