RIFLESSIONE MATTUTINA di Santo Grasso

RIFLESSIONE MATTUTINA

“Amara e duci”

A voti ci giramu tutti ‘ntunnu,
senza sapiri ‘nsocchi è megghiu fari,
vali pi tutti ‘a genti ‘nta lu munnu
e sugnu certu di nun mi sbagghiari.

Cu si la porta appressu tutta ‘a vita,
cu ci l’ammuccia a l’occhiu di la genti,
cu ‘a trova ‘nta ‘nu santu fattu ‘i crita,
cu dici: iu la sacciu, ‘un sapi nenti!

Cu havi datu tortu ‘a malidici,
cu fa lu fissa pi nun fari dannu,
cu taci pi nun pèrdiri l’amici,
cu nni lu dubbiu, si la va circannu.

Dunchi signuri me’ pi quantu vali,
la virità fa beni… e puru mali.

Santo Grasso

tribàLe