L'OMU di Nino Martoglio

L'omu

( parra la fimmina )

L'omu è chiù bruttu di la zazzamita,
chiù leggiu di la negghia e la cumeta,
svinturata cu ' è ca sì marita,
passa sett'anni di mala praneta!

Si non travàgghia e fa lu sfacinnatu,
Pigghia qualunqui viziu ben pulitu,
lu jocu l'arriduci senza ciatu,
ti sbinni anchi l'aneddi di lu jtu.

S'è puvireddu e tu porti munita,
di prima ci fa fari ' n'abbulata,
da poi, quannu non c'è di fari vita,
ti lassa dintra, nuda e scunsulata.

S ' è riccu e t'ha pigghiatu senza doti,
ti tratta peju assai di li criati,
e suddu ti lamenti, abbenuoti,
macari po ' scippari vastunati.

Si ccu lu giniusu ti mariti
li torti ti li fa senza cuntati,
e siddu si ' gilusa, o vi spartiti,
o campi comu l'animi addannati.

Si ti lu pigghi bruttu e ' nnamuratu,
la bedda libirtà ti l'ha ' vinnutu,
ti sta a li costi, comu un tiraciatu,
gilusu, diffidenti e privinutu!

Suddu t'ammatti di l'analfabeti
o puramenti di l'arripudduti,
li to' biddizzi s' hannu a stari muti.

Si ti lu pigghi nobili o ' struitu
vestiti bona e parrici malatu,
pirchì s ' annunca è certu e garintitu
ca doppu un misi s ' ha spuitizzatu!

In concrusioni, l'omu è scialaratu,
avi pri cori un pezzu di granitu,
babba cu ' è ca pri canciari statu
di ssu nnimoniu nni fa lu maritu.

Perciò, fimmini mei ca m'ascutati,
o beddi o brutti, o ricchi o senza doti,
è megghiu assai ca non vi maritati
e vi faciti tutti batioti.

Nino Martoglio