STIDDI CADENTI di Giuseppe Denaro (Turneddu)

STIDDI CADENTI
(Ntra na siritina d'Austu)

Di notti, austu, di lu firmamentu,
apri li catarrati, e a li viventi,
ci manna di li stiddi, a centu a centu,
argintati faiddi risplinnenti.

Sfricianu pi lu celu, in un mumentu,
come saitti o luciti sirpenti...
Su' fiacculi divini tutti argentu
o luminusi gemmi d'orienti?

Cadunu forsi 'ntra l'abbissi scuri,
lassannu argentu in luminusa scia,
l'Angili ribbillusi a lu Signuri?

L'urtimi frecci su' ca Giovi invia?
Su' fulmini pi l'omu tradituri,
o su' lacrimi ardenti di Maria?

Giuseppe DENARO (Turneddu)