CHIOVI di Santo Grasso

E chiovi ...

E chiovi ancora, chiovi e svintulìa,
lu ventu rumpi a l’arbuli ‘i ramuzzi,
un lampu in luntananza, poi trunìa
lu celu chianci senza ‘i so’ stidduzzi

E chiovi ancora, st’acqua...martiddìa
e nun ci duna paci a l’acidduzzi,
ca nun putènnu jiri a la campìa
nun hannu civu pi li so’ figghiuzzi.

E chiovi ancora, ‘u suli ‘un fa chiarìa,
la genti è ‘nchiusa ‘nta li so’ casuzzi,
un vecchiu supra ‘a seggia sunnulìa,
‘na matri nutri ‘u figghiu a li minnuzzi.

E chiovi, chiovi ancora cu l’abbunnu
comu si fussi ‘a fini di lu munnu.

tribàLe

Santo Grasso