SAN MARTINO A SARAUSA ANNI E ANNI FA - Armando Carruba .

Più ca 'na festa riligiusa San Martinu è festa pupulari unni si fisteggia l'arrivu ddo' vinu novu.
'Nzinu ai primi ddo' nuvicentu a Sarausa, era festa 'nté quarteri pupulari d'Ortigia ca all'occasioni divintava un palcuscenicu di vita!
Si ballava e si cantava aspitannu l'arrivu dde' carretti cco' vinu novu; 'a taverna era 'u puntu cintrali unu si truvava tutta 'a genti fidili 'o dittu:

La morti di lu purpu è la cipudda

la vita dill'omu è la taverna!

'U zuccaru priparava i sanfurricci, bastuncini di meli e zuccuru, gioia ppe' carusi. 'U ciauru dde' castagni arrustuti s'ammiscava cca' vuci ddo' vanniaturi :

E' San Martinu, zippuli e vinu

llicca mommu e favi caliati

sarausani, siti ammitati.

Cesti di zippuli, cosa duci dda' cucina puvira siciliana,  vineva offertu cunzati cco' meli, zuccuru e vinu cottu di carrubba, mentri 'u macillaiu vinneva sangunazzu e robba cotta...
Poi, spuntavanu i carretti 'mpinnacciati, capulavuri di n'arti pupulari e attornu 'e carretti carrichi 'i vinu balli e canti pupulari mentri 'u tavirnaru offriva 'a vippita con ginirusa allegria.
Sta manera di fari festa, rialava 'a genti gioia e 'a rinneva protagunista di 'n munnu anticu e novu...