MAMMA di Gianni Farrugio

MAMMA

Tu mi criscisti, mi mannasti a scola...
appoi mi mittisti l‘ali e mi dicisti...vola,
e iu vulai ‘ntra paisi strani,
senza pinzari ca ti lassai ‘nte peni.
Partii,..ti lassai sula,
comu na varca senza vila,
a testa frasturnata...l‘occhi chini,
e senza sangu tutti li to vini.
Ti lassai sula... partii luntanu
ma vidu ancòra ca mi stenni a manu
mi salutavi ma dicevi torna...
t‘aspettu cca, cuntu li me jorna.
Ora c‘haiu furriatu menzu munnu,
e l‘haiu vistu quasi ‘nsinu ‘nfunnu,
ora m‘arriposu e pensu a tia,
ccu tantu amuri e tanta nostalgia.
E pensu quantu beni mi vulevi,
a quanti cosi belli mi dicevi:
attentu non sudari...s‘annunca t‘arrifriddi,
e duci duci mi mittevi i manu ‘nte capiddi!
M‘accarizzavi, mi strincevi forti...
siparari ni po‘ sulu la morti!
La morti ‘npijtusa t‘arrubbau,
e luntanu...luntanu di mia ti purtau.
Si fici tardu, passànu li me anni,
tra gioi, duluri e sacrifici ranni!
Stancu é u me cori, stanca é la testa,
ma prestu n‘ancuntrammu e sarà festa!

di Gianni Farrugio