SAN FRANCESCU 'I PAULA

PRIERA AMMENZU U MARI

Quannu lu scuru è fittu, e u mari è na tavula
la luna è sutta e nuvola, e u ventu non si senti
ju m’ha rivoggiu a Vui, o San Francischi Paula,
proteggi la me varca, e tutta la me genti.
Vi fazzu sta priera, ccu l’anima sincera
c’è tuttu lu me cori, o Santu Protettori.
Oh San Francischi Paula, gran Santu e cunfissuri
Patrunu e Prutitturi, di tutti i marinari
quannu sugnu ppi mari, ccu vrazza e peri nuri
picchì ccu la natura, non vogghiu cuntrastari
fa ca lu to vastuni, diventi u me timuni
e ca lu to mantellu, diventi u me battellu.
Vi fazzu sta priera, ccu l’anima sincera
c’è tuttu lu me cori, o Santu Protettori.
Oh San Francischi Paula, Tu si lu navigari
Tu si lu difinsuri, di tutti i piccaturi
quannu la notti è calma, è senza riuturi
quannu lu suli nesci, ch’è ‘nfocu di lu mari
picchì lu munnu ‘nteru, vulissi quariari.
Vi fazzu sta priera, ccu l’anima sincera
c’è tuttu lu me cori, o Santu Protettori.
Oh San Francischi Paula, gran Santu binirittu
iu Vi lu pottu sempri, ccu gioia lu rispettu
ora ca li me anni, su addivintati tanti
e ancora piscu opi, e trigghi ppi la genti
non vogghiu cchiù do suli, lu corpu me abbruciatu
e mancu di li pisci, finiri mangiatu.
Dopu na vita amara, misera e di stenti
fammi turnari a casa, sanu comu sempri
E’ chista a me priera, ca fazzu ammenzu o mari
c’è tuttu lu me cori, o Santu Protettori.