'U PEZZU D'AGGHI

I cacciaturi chi di quannu 'n quannu pàssunu di campagni, ppe' viddani sunu spissu facci novi e maluvisti, vardati sutt'occhi sinu a quando cani e cacciatura s'arrassanu; ma ci ssu di chiddi ca,  macari nun canusciuti, posunu 'u fucili, s'assettunu e parrunu, mentri i cani mansi mansi fanu 'na giriata senza sconsu. Parranu, e i viddani 'i 'scutanu a vucca aperta ca sentunu nuvità.
Unu di chisti 'na vota ci dissi a 'n vecchiu: "'Nveci di siminari tuttu a frumentu, un pezzu di tirrinu chiantatilu a agghi: vi rennunu di cchiù! ca si i faciti a mazzuneddi, i purtati o mircatu... autru chi saccuneddi di frumentu!!!"
'U vecchiu si pirsuadiu, quasi avissi 'ntisu a parola 'i Salumoni, e 'dd'annu, un pezzu chi avìa sempri statu ppo' siminatu, fu chiantatu a agghi.
E 'bbivira, e zappulìa... vinni 'u tempu chi i cimi dde' chiantimi isaru, e comu isaru! Ma un jornu, a prima matina, 'u vecchiu viddanu s'accurgiu chi di fora a fora e primi burduri i cimi érunu pizzicati, pigghiati 'ill'acquazzina.
Turnò l'indumani, e ancora péggiu; 'u mali era duplicatu e s'allargava a giru a giru; 'i fora a fora, paru paru, i cimi 'ill'agghi érunu 'ngiallinuti.
'U terzu jornu, ca vucca 'nvilinata, comu avissi masticatu agghiu, pinsannu 'o cacciaturi cci vinni di diri:

O fa' 'n culu, pezzu d'agghi
e o fa' 'n culu a cu' cogghi cogghi,
ma sa veni chiddu dill'agghi
tà vidi tu comu tà sbrogghi.
L'ariu nettu e 'u culu vagnatu,
o fa' 'n culu l'agghi e cu' l'ha chiantatu!