'U SULI, 'U TRAVAGGHIU E L'AMURI di Armando Carruba

‘U SULI, ‘U TRAVAGGHIU E L’AMURI

‘U travagghiu

nun canta cchiù a Priolu,

e i picciotti ‘a sira

cuntanu maruna,

sutta ‘n celu senza stiddi.

Nun si toccunu

‘i sonna,

chini ‘i spiranza,

ppi na vita sicura

cco’ travagghiu ca paja.

Nun si tocca l’amuri

ca senza travagghiu

mori ‘nto’ cori,

anniatu ogni jornu

‘nta’ ‘n chiantu mutu.

‘U suli riri sulu a passareddi

cca ppi nidu

hanu ‘n passu d’omu

dda’ culonna.

Cunzatila a festa

l’innustria a Priolu,

comu na vota …

quannu ‘u suli

traseva ‘nte’ casi

e cimineri fumanti

cuntavunu ‘o celu

‘a cuntintizza di genti

ca nun accattaru  valiggi.

Armando CARRUBA