Belpassu 'n paiseddu di muntagna,
riccu di uliveti e bastarduna;
li turruncini sù 'na cuccagna
mentri l'aria ca c'è saluti duna.
La villa ca pussedi è cosa magna
e Santa luciuzza è la patruna;
pi figghi dotti di nuddu si spagna
e pi biddizzi porta la curuna.
Piccatu ca d'invernu specialmenti
quannu su l'ottu pari menzannotti
pirchè si vidi 'n giru poca genti.
Siddu turnassi, di jurnu o di notti,
Ninu Martogliu ca fu 'na gran menti,
ristassi e si scurdassi di li morti.
di Saverio Malgioglio
Nessun commento:
Posta un commento