NATALI IERI E OGGI di Federico Vaccaro - voce Armando Carruba

NATALI IERI E OGGI

Quann`era picciriddu,
p`i festi di Natali,
vincèvamu lu friddu 
cu `stu midicinali:
tutti, parenti e amici,
jucàvamu filici.

A` tùmmula custava
tri liri `na cartella,
niscennu, s`attuppava
lu nùmmaru in casella
cu i scocci d`i mantrini
tagghiati a quatratini!

Brìnnisi e panittuni
eranu cosa rara,
manciàvamu sfinciuni,
vinu di la quartara,
pi dolci: bucciddrati
cu i ménnuli atturrati!

`Stu cunsumismu d`ora,
chi chiàmanu prugressu,
ammutta a stari fora,
a spénniri in eccessu.
Puru cu nun guadagna
s`accatta la sciampagna!

Quali àrbulu e regali!
C`eranu i pastureddi
di crita, fatti mali,
p`i nichi sempri beddi.
Si unu s`azzuppava
cu a codda s`aggiustava!

Pi `nsinu u Bammineddu
era cchiù vecchiu `i mia,
però sempri u cchiù beddu
di tutta a cumpagnia!
Natali...! Di `sta festa
`nto cori zoccu resta?!

Federico Vaccaro.