| Putissi |
| Putissi pri miraculu divinu turnari comu quannu era carusu, quannu pri mia la vita era n'giardinu, menzu apertu e menzu chiusu! Turnari cu li sensi di 'na vota, cu ddi limpidi occhi ancora puri, e cu la fantasia libera e sciota vìdiri cosi belli a tutti l'uri! Ma lu giardinu addivintò 'na sciara d'ardichi 'nfrattinata e di ruvetti, si ci crisci 'na ciura è troppu rara, e si la cogghi poi non ti diletti. 'Ntra sta sciara furrìu comu 'n'aceddu cu l'ali rutti ca non pò vulari, e ccà 'ntra carammuni e spicuneddu lassu li pinni ca mi sù chiù cari. Francesco Guglielmino |
Nessun commento:
Posta un commento