SI FUSSI di Santo Grasso

Una meravigliosa poesia dell'amico poeta Santo Grasso

SI FUSSI...

Si tu fussitu ‘a terra e iu lu mari
circassi amuri d’intra lu tò cori,
cu l’unni mei vinissi a ti vasari
quannu fa scuru ca lu jornu mori.

Si fussi iu lu suli e tu la luna,
suffrissi tutti ‘i voti a lu ghiurnari
vidènnu a tia, rigina cu ‘a curuna
c’aspetti a mia, saluti e poi scumpari.
****
Si tu fùssitu l’acqua e iu lu focu
senza difisa mi farìa stutari,
poi nni lu mari tò circassi locu
tuttu lu tempu senza mi stancari.
****
Si iu fussi lu ventu e tu ‘nu ciuri
t’acarizzassi duci ogni matinu,
poi cu dilicatizza e li primuri
sciucassi ‘i fogghi to’di lu risinu.
****
Si tu fussitu gemma e iu sculturi,
vulissi ‘i to’ fattizzi mudillari
comu ‘na stidda, china di splinnuri
poi du me cori fàriti arrubbari.
****
Si fussi iu, si fussi... ma cu sugnu?
Iu sugnu nenti e tu? La me pazzìa!
Si tu mi duni amuri, iu ti dugnu
tutta ‘a ducizza di la vita mia.

Santo Grasso