I FRATI PII - racconto popolare -I

I FRATI PII

'Na vota successi ca scattiau 'a muntagna e 'u focu scurreva a sciumara, abbruciannu e distruennu tuttu: jardini, orti, casi... I genti scantata scappavunu dde' sò paisi ppi sarvarisi almenu 'a vita, nun putennu sarvari 'a robba. C'eranu 'ntà l'autri ddu vecchi, maritu e mugghieri, ca scappavanu di la morti, 'nzemi ccu' ddu' figghi c'avevanu. Lu focu cuntinuava a scurriri sempri, minuzzusi e pareva assicutari 'a genti. I ddu' vecchi circavunu di caminari cchiù prestu ca putevunu; la 'a forza non avianu; e ristaru arreri i tutti. Li figghi mischini avissunu macari datu a sò forza ò patri e a matri, basta di vidilli sarvi. Avevanu ristatu tutti quattru suli troppu arreri; e u focu curreva forti pirchì 'a strata era di calata. A un certu puntu u focu li juncìu; e allura li figghi dispirati si pigghiaru 'n coddu 'u patri e a matri ppi scappari. Ma ccu ddu pisu putevunu jiri di cursa? E u ciumi di focu - miraculu di Diu! - inveci d'agghiutirisilli comu avia fattu ccu casi e l'arvuli, si spartìu in ddu parti, una di ccà, una di ddà, arrispittannu d'accussì l'affettu ginirusu di ddi du' picciotti.