PIRCHI' LI DUDICI APOSTULI FORU TUTTI PISCATURI - popolare -

PIRCHI' LI DUDICI APOSTULI FORU TUTTI PISCATURI

'Na vota lu parrucu di S. Japicu avìa a fari la funzioni di la nuttata di Natali. Prima d'accuminzari, pigghiò nuciddi e mustazzola e li spartìu a li parrineddi ch'avianu a fari la funzioni e cci dissi: -"Picciotti, divirtitivi; ma dumani matinu m'aviti a sapiri a diri pirchì nostru Signuri Gesù Cristu pigghiau li dudici Apostuli tutti di li piscaturi.
Li parrineddi si misuru a jucari a li nuciddi, ma ogni tantu pinzavunu a lu dubbiu chi cci avia fattu lu parrucu.
A lu nnumani, jornu di Natali, quannu la funzioni finìu e li parrineddi si ni stavunu jennu a li casi... "Picciotti, - ci dici lu parrucu - comu finìu l'affari di li piscaturi di nostru Signuri Gesù Cristu?"
Nuddu di li parrineddi cci sappi arrispunniri. All'ultimu lu cchiù spiritusu dissi: -" Patri Parrucu, tutti quantu semu n'avemi sfirniciatu pi sapiri lu pirchì di sta cosa; ma nuddu cci avemu pututu arrivari. Chista è na cosa difficili assai!"
"Quanu è chistu, rispunnìu 'u parrucu, lu pirchì vi lu dicu ju: Gesù Cristu scìgghiu tutti piscaturi ppi canusciri u tempu. 
E cu 'sta parabula lu parrucu di S Japicu a la Marina vosi 'nsignari ca quannu si fa 'na cosa s'havi a sapiri fari a lu sò tempu.

popolare