DIDICATU A ME PATRI di Maria Agrippina Amantia

DIDICATA A ME PATRI

Era l'iniziu di l'anni cinquanta,
me patri da so vita nun si cuntenta.
Di canciari sorti sempri pensa,
di l'avvintura mancu s'inni scansa.

Sta terra di Sicilia duci e bedda
ca la travagghi ca carina e lu zappuni,
scippanu sempri spini, livannu balatuni,
nun ti duna mancu nun muccuni.

Me patri p'affruntari la so sorti,
era decisu finu alla morti.
Pinsava ca so terra nun ci dava nenti,
luntanu vulia iri a fari l'emigranti

Me nannu nun vulia ca lu figghiu s'inni iva
ca sarmi di terra assai ni pussidia
ma a me patruzzu lu zappuni c'iccò pisanti
l'abbrazzò a tutti e s'inni ivu cuntenti.

I larmi di me nanna e chiddi di me matri,
putevanu ijnchiri dda matina quattru cati,
me nannu, si nni stava dda e so lati
l'avissi pigghiatu a cauci e maniati

Me patri cu li sacchetti chini di spiranza,
a li sentimenti nun desi mpurtanza.
Co megghiu vistitu, chiddu gessatu,
acchianò supra lu trenu tuttu priatu.

Nun si girò mancu na vota a salutari,
la matri e la mugghieri c'avia lassari.
jiu nica, nica mbrazza a me mamma,
nenti capiva e nun ci dava mpurtanza.

U bellu vinni quannu a la fruntiera,
u ficiru scinniri e lu pigghiarru a sulu.
Ci ficiru l'esami di lu sangu e la dintera,
ci cuntarru puru li pila di lu culu.

Povuru patri mio, ma chi facisti?
Pinsavi tu, ca iennu dda luntanu,
di sordi t'inghivi sanu, sanu
e niscevanu di lu tascappanu.

Erutu figghiu unicu, facevi lu patruni,
e t'arridducisti a scavari carbuni.
Avevi la to casa, avevi a to famigghia,
a canciasti sulu, pi nun pugnu di canigghia.

Ti purtasti a me matri , lassasti ca a to figghia,
criscivu senza matri e senza a na famigghia.
Svinnisti li to terri, t'inni isti in continenti,
livasti puri li radichi e nun ristò cchiù nenti.

Muristi, patri miu, e mi facisti pena
pi tutta la to vita assicutasti dda vena.
La ranni eredità ca mi lassasti a mia,
assumigghiai a tia, sacciu scriviri puisia.

maria agrippina