'A LIGGENDA D''E DU' FRATI di Arturo Messina

LEGGENDA SIRACUSANA
C'è una leggenda sarausana che si tramanda di bocca in bocca, ed è quella degli scogli ddé ddu frati. Il prof. Arturo Messina ne ha tirato fuori questi versi:

‘A LIGGENDA D’’E DU’ FRATI

E’ tantu beddu ’u mari ’i Sarausa!
E’ tantu beddu ma tradimintusu
Comu ‘na rara fimmina attraenti
v’alletta e v’arruvina ‘n tempu ‘n nenti!
Pirciò, nun vi fidati, stati attenti!
Ci su’ du’ scogghi a mari a Sarausa,
vicinu a la cuntrada ‘i Mazzaruna:
“ I scogghi d’’e du’ frati ” su’ chiamati
pi ‘n fattu ca successi pi daveru
a ca cummossi tuttu lu paisi
Lu scogghiu chiù nicuzzu era ‘n carusu
ca ‘n jiornu arruzzulau di la scugghiera:
vicinu, lu fratuzzu granni c’era,
ca appi lu curaggiu ‘i si jittari;
ma l’ unna l’ agghiuttìu e lu fici anniari
Mari, tradimintusu e tristu si’!
Ridi, ma appoi ‘mpazzisci, ma pirchì?
Quanti figghi di matri tu arruvini!
Pari accussì ‘nnuccenti lu matinu,
m’ appoi addiventi tantu peggiu di Cainu
e a cu’ si fida ‘i tia tradisci e nun hai pena!
Ora, ‘n menzu a lu mari, li du’ frati
du’ scogghi su’ d’ allura addivintati:
pari comu si fùssunu abbrazzati,
pi diri a tutta ‘a genti ca l’ amuri
nun sapi sacrifizi né duluri
Ma l’unna c’agghiuttìu li du’ criatura
di ‘ssu dilittu infami ‘un s’ha’ pintutu:
aspetta ca zoccu autru s’ avvicina
‘nta ‘ss’acqua c’ accussì ‘mpruvvisa muta
e ‘n mostru t’ addiventa ‘n tempu ‘n’ura!

Arturo MESSINA