CIANCIANI
Na lu silenziu di la notti funna
sentu un allegru sonu di cianciani...
sù miludii luntani
ca svigghianu 'ntrà st'arma muribunna
di gran ducizza n' unna!
Passa un carrettu anticu
un carrettu d'un epuca passata,
e c'è lu mulu cu la sunagghiera
ca tistiannu và pi la muntata
di la sfussata e misira trazzera
Ci abbannunò li rètini all'armali
lu carritteri 'nsunnacchiatu e straccu
jttatu comu un saccu,
sonna di la sò casa li ristori,
e la lanterna, sutta lu carrettu,
ci sbattulìa comu lu sò cori!
Ci sù carretti ancora pi lu munnu
ca vannu pi li munti e li vaddati?
ci sù cianciani ancora?
ci sù cavaddi e muli svinturati
'nta 'st'epuca di razzi e di muturi?
E lu carrettu avanza lentu lentu
pi li trazzeri misiri e stramani,
lu zurrichiu di li sò roti, ju sentu,
li zocculi firrati di l'armali,
ca sù li noti d'accumpagnamentu
a la canzuna di li sò cianciani.
Puru stu cori miu è na cianciana
ca cianciania ora lentu ora forti,
è ghiuntu a lu pinninu affaticatu
ciancianniannu và... 'ncontru a la morti!
Giuseppe Denaro
Nessun commento:
Posta un commento