LU SULI E LA LUNA
Du jornu 'u suli si firmò 'ntò celu
'a luna dissi: "ssì cammurìa veru
ppò 'ssiri tutti li jorna ti nna ghiri
a fariti lu bagnu 'ntà lu mari
e oggi ca sugnu parata a festa
arresti fermu e mutu 'ntà chiazza?
Ohu! Nun circari na scusa cretina
ca scoppiasti la rota o 'a binzina...
Avanti cumincia prestu a tacchiari,
ca ora 'ntò celu haju cumpariri!"
Lu suli si quariò e ci arrispusi
"ju sugnu omu e nun cercu li scusi
sugnu 'ntà chiazza c'aspettu la Santa
ca nun ci vidi la bedda mischinedda.
E ccu li me' raggi chini d'amuri
mi vogghiu vasari li sarausani
veni a diri ca tu spunti dumani
oggi no, ca haju lu me' chiffari!"
'Ntantu tra spari, botti e battimani
cumparìu 'a Santa in cattedrali
e mentri 'a prucissioni caminava,
ebbiva Santa Lucia, si sinteva!
Dopu un pizzuddu li purtaturi
eranu tutti 'ntà mari 'i suduri
la fatica, di cchiù, ranni si faceva
sutta ddu gran suli ca forti pirciava.
Lucia, capìu 'a situazioni
e parrannu all'aricchi di lu suli
ci sciusciò paru paru 'sti ddu paroli:
"Ti ringraziu ppi lu tò granni amuri
ma ora è ura ca ti na ghiri...
ora ci voli la tò cumpagna luna
pp'arrifriscari 'sti criatura
ca m'hanu à purtari a Burgata
e tu 'u sai ca è longa a strata!"
U suli nun dissi mancu 'na parola
signu ca 'stu fattu ci dispiaceva,
a Santa 'u capìu, dissi ancora:
"Luna, aspetta, nun 'ssiri priscialora!
'U tridici dicembri di ogni anno
lu suli 'ntà lu mari nun si fa bagnu,
accumpagnari la luna di darreri,
a fari 'nsumma va' lu cavaleri!"
La luna lesta, desi 'na 'nnaculiata
e 'ntò celu fci la so' trasuta!
Lu firmamentu? Tuttu nu brillanti!
Lu suli arreri, la luna avanti...
E se ddu jornu talìi lu celu,
e nun ti sa spiegari stu misteru
pirchì è così bene illuminato
'u fattu è chistu e l'haju cuntatu.
Armando Carruba
Nessun commento:
Posta un commento