| LU CAVADDU C`era un cavaddu di beddi fattizzi baiu di pilatura, e avia un gran passu, era l`invidia pri li soi biddizzi, e quann`iddu niscia facìa fracassu. Lu so patruni ci facia carizzi, lu vulia beni, e l`avia fattu grassu ma `ntra lu megghiu di li valintizzi nna coscia si spizzau `ntra un malu passu. D`iddu ogni musca si `mpussessa allura, ogni sceccu chiù vili lu rimpetta, ricivi cauci, e muzzicuni ogn`ura cu lu stimava, la sò morti aspetta. O quantu ddu proverbiu m`innamura: All`arvulu cadutu, accetta, accetta. Giuseppe Marraffino |
Nessun commento:
Posta un commento