JANU 'U SCERIFFU di Armando Carruba

JANU 'U SCERIFFU

Dura è 'a vita a lu campari
ci voli furtuna nun c'è chi diri,
Januzzu nascisti ccu mala stidda
ccu tia 'a vita nun fu mai modda.

Dicevunu, quann'eri picciriddu
ca ti vinneru pp' 'n pani: nu scoddu
e picca sordi misi 'ntà sacchetta
di ccu nun aveva cuscenza netta.

Lignati ni scippasti ogni jornu
ti li pigghiavutu senza lamentu
nuatri picciriddi a taliari
senza putiri mai interviniri.

'N jornu scattiò Turuzzu Liuni (1)
firmò dda' manu ca dava duluri
e di tannu finisti di jucari
cche' picciriddi nichi ddo' quarteri

Carusu ha jutu a' aiutari
a ccu vinneva frutta peri peri
purtannu 'u carrettu già jnchiutu
'nzinu puzzu 'ngigneri ddo' mircatu

Foru 'i films ccu lu giovanottu
a mittiriti stidda 'ntò giubottu
divintannu ppi tutti pari pari
Janu 'u sceriffu nun c'è cchi diri

E ti calasti bonu 'ntà la parti
ccò traficu scurreva lestamenti
a matina ccu videva a tia
ci passava ogni malincunia

U restu è storia di chisti jorna
di 'n omu onestu senza virgogna
ca la vita ppi falla rispittari
a tutti pari l'esempiu s'ha dari

Jsti a Ciuriddia da don Orioni
e ddà ti facisti vuliri beni
Janu sceriffu, giustu tra li giusti
ni vulisti lassari 'ntà li festi

E festa 'n celu ppi tia sarà
t'ha meritatu la tò eternità
cca stidda 'i lanna vulisti diri
comu 'ntà vita si c'ha cumpurtari

Armando Carruba