'U TRONU di Maria Teresa Mauceri

'U TRONU

Nica
'nt''e jurnati di tempesta
me' matri
ppi nu' mi scantari
d''e trona... mi dicia:

"Chistu è S. Giuseppi
... ca mattiddia
pp'aggiustarisi 'a casa
nu' ti scantari!"

"Ma sempri '
'a casa s'aggiusta
S. Giuseppi má?"
ju ci rispunnia.

"Si, figghia mia, pirchì
'n vecchiu stuzziusu
ci jetta sempri petri
e 'a rrumpi nautra vota."

Quannu ' n tronu
mi facia risatari
... p''o scantu
ja 'nti me' matri dicennu:

"Ju nu'capisciu má
pirchì S. Giuseppi
nu' ci duna 'na tumpulata
a 'stu vecchiu tintu!"

Idda quasi ridennu:
"S. Giuseppi è 'u patri
di Gesù bbamminu,
'u pirduna pirchi è vecchiu.

Rivorditi, figghia mia,
ca 'i pirsuni vecchi...
s'hana rispittari
nu' 'nt''o scurdari."

Ju cridennu
e' so' paroli
continuava a jucari
oppuru m'addummiscia.

Chera bedda
a 'nnuccenza di prima!
Ora 'nveci... 'i figghi
primu 'i nasciri...
sanu già comu si mori.

Maria Teresa Mauceri
2°premio "Trofeo Turiddu Bella" SR