I PONTI di Armando Carruba

Furriannu tra i cosi mei, haju truvatu 'sti quattru versi scritti accussì comu veni veni, a riurdari picciriddi ca stavamu a taliari u mari dda' i spaccazzi ddo' ponti umbertinu. E i cosi i 'na vota, comu a baracca 'i Michilina 'nto' spiazzu dell'INAIL 60 liri ppi virilla, era grossa ma grossa 'sta picciridda, tantu ca a Sarausa ppi tantu tempu ppi diri a una ch'era 'rossa ci dicevunu "ssì quantu Michilina!". E poi 'ntà l'autru spiazzu s'abbruciava Cannaluvari, vinevunu i cantastorie e l'ambulanti catanisi ca vinnevunu "robba bruciata" Vu riurdati? camion chini di stoffa alcuni capi bruciati tanticchia ppi fari appariri ca era stoffa d'un magazzinu bruciato e che era un affare accattari a picca soddi (era robba scarsa ca cchiu' scarsa nun cci n'era) ... Sarausa anni '50

I PONTI

Tu vecchiu ponti da me' Sarausa,
quannu ti vidu m'arricordu cosa
ca eru picciriddu e taliava
dde' spaccazzi tò, 'u mari videva.

E dda' tistuzza misa 'nficcata
c'avissi statu tutta 'a jurnata
se me' patri ppi farimminni jiri
mi isava supra 'u curniciuni!

Chi bedda vista la me' Sarausa!
'i cca' supra tuttu nautra cosa
poi ripigghiavu a caminari
cuntentu e filici 'u me' cori!

'Ntò spiazzu 'ill'INAIL 'na matina
ci fu a baracca 'i Michilina
'na carusa 'rossa sprupurziunata
cinquanta liri ppi la so' viduta.

Ppi fari accattari u bigliettu
ddi 'n purtusu mustrava 'u vrazzu
Michilina ristò ppi Sarausa
comu signu di 'na 'rossa carusa

E ddi faccia 'ntà l'autru piazzali
ca s'abbrucciava Re Cannaluvari,
ppi nun parrari di li catanisi
ca vinnevunu i stoffi bruciati!

Nun era veru nenti, cummircianti,
anticchia stoffa bruciata davanti
ppi 'ssiri tuttu 'nu beddu tiatru
dicevunu: magazzinu bruciatu!

Ammucca fissa ca machina passa
si soli diri; ppi ccu arripezza
la vita, e tira sempri avanti
c'è sempri 'n ponti ppi tutta a genti

Armando Carruba