SCHETTA NUN T'APPI Vincenzo Adamo

Schetta non t'appi, maritata t'appi...........

La giuvintù mia si nni jiu squarata
sulu 'u ricordu di na taliata
o pi dirla in manera assai eleganti
l'occhi chini e 'i manu vacanti.

Filippa bedda quantu t'annacavi
cchiù ti taliava e cchiù mi surisfavi
sintìa lu ciautu ri donna matura
partia 'a testa, scinnìanu li surura.

Ora chi si cu mia cchiù nun mi scappi
di schetta ti vulia ma poi nun t'appi
ma lu vuliri meu finiù a schifiu
arrivau Niculinu e mi futtiiu.

Jò persi tempu e nun mi dichiarai
Niculinu nisciu e trasiu Nanai
tu t' 'a spassavi a farti munciuniari
e comu un fissa jò stava a taliari.

E certamenti nuddu ti schifiava
appena chi ogni zzitu ti lassava
pur s'è notoriu, ch' 'a zita lassata
s'un nn'è tuccata e certu vaviata.

Pizzichi e vasi non fannu pirtusa
e mancu su cosa camurriusa
sunnu 'i spiticchi di lu veru amuri
su, di lu fruttu, li chiù beddi ciuri.

Ju spirava chi 'nna stu trasi e nesci,
ma chiddu chi si spira 'un arrinesci,
chi s'avissi a truvatu 'a cugnitura
p'aviri l'occasioni d' 'a 'ntratura.

Ninu s'accuffulau e chiù 'un si mossi
però prestu cci foru sciarri 'rossi
tò patri era cuntrariu a sta zitanza
ma prestu prestu ti vunciau la panza.

Signu chi nun cci fu sulu a vasata
e mancu causa fu la pizzicata
cci fu lu dannu e poi lu dannu fattu
lu patri preti lu sanciu cu l'attu.

Lu jornu chi ti jisti a maritari
'un m'arristau cchiù nenti ri spirari
pi mia fu un funirali cu la missa,
mi turmintai p'un ura comu un fissa.

'Na casa turnatu quasi rispiratu
mi sintia comu un cani vastunatu
Filippa mia, oramai ch'eri pirduta
la vita procedìa tantu sbannuta.

Poi, quannu chi si rici lu distinu
di morti disgraziata morsi Ninu
allura riturnau la ciamma 'n cori
e 'n menti ripitìa : " tintu cu' mori ".

Certu, la cosa, mi l'appi a pinzari
chissi su cosi chi vonnu quagghiari
picchi s' 'a donna zzita è vaviata
va cerca com' è chiddra maritata !,

Non persi tempu a sciogghiri s'arcanu
vinni e t'addumannai subbitu a manu
poi cu la manu mi rasti lu restu
e fu accussì chi t'appi prestu prestu.

Filippa mia oramai cchiù non mi scappi
di schetta ti vulia ma poi nun t'appi
di schetta nò, ma maritata t'appi
basta chi t'appi e comu t'appi t'appi.

Vincenzo Adamo

da : Poesie scherzevoli