'U NANNU CUNTA - 'A mugghieri babbasunazza - (popolare) Armando Carruba

‘A MUGGHIERI BABBASUNAZZA

C’era ‘na vota ‘na mugghieri e ‘n maritu. ‘A mugghieri aveva ‘na vistina cunsumata e nun faceva autru a rappizzalla. ‘U maritu a ‘stu puntu pinzò d’accattarici ‘na vistina nova e accussì fici. E a mugghieri? Cuminciò a tagghiari ‘a vistina nova ppi rappizzari chidda vecchia! Quannu ‘u maritu turnò a casa, a mugghieri tutta cuntenta ci fici vidiri a vistina rappizzata, dicennuci: “Vistu che travagghiu haju fattu?” e s’aspittava i cumplimenti… Ma quannu ‘u maritu visti ca avìa strazzatu ‘a vistina nova pp’arripizzari chidda vecchia, lignati a leva pilu ca la lassò cchiù morta ca viva…!

Favula ditta, favula scritta

Diciti ‘a vostra, ca ‘a mia l’haju ditta!