Quannu i navi passavunu davanti a so' villa o Capi di Milazzu, sunavunu tri voti e isavanu 'a bannera, ppi salutari; 'o spissu iddu s'affacciava e rispunneva salutannu. A 'na midagghia d'oru ci tòccunu l'onuri militari; ed iddu era midagghia d'oru du' voti, e quattru voti medagghia d'argentu.
Nascìu a Milazzu 'ntò 1887, Capitanu da' Marina Mircantili, 'ntò 1914 fu fattu suttatinenti di vascellu di cumprimentu. Duranti 'a prima guerra mundiali fu promosso tinenti di vascellu in serviziu attivu pirmanenti, poi pi meritu di guerra capitanu di curvetta e appressu capitanu di frigata.
'A guerra 'a fici partecipannu a cintinara di 'mprisi, specialmenti comu cumannanti di squadrigli siluranti. 'Ntò 1917 'ffunnò 'a curazzata Vienna 'ntò portu di Triesti; 'ntà frivaru du 1918 participò ccu D'Annunziu e Cianu 'a "beffa di Buccari", e all'ultimu, 'u 10 giugnu 1918, 'ffunnò vicinu a Premuda 'a curazzata austriaca Santu Stefanu.
Chi curaggiu!... Unni 'i truvati omini i stissi? Mancu Orlando e mancu Rinaldo: chi è 'a stissa cosa cummàttiri cà spata 'n terra o a cavaddu?
'U chiamaru "l'affunnaturi", e fu promossu '0 gradu d'ammiragliu.
'Ntò 1920 si dimittiu da Marina Militari e turnò 'ntà Marina Mircantili.
Fu presidenti da sucità di Navigazioni Eolia e 'ntò 1943 du' Llyod Triestinu.
'Ntò 1932, ppi meriti militari chi 'u Re cci ricanusciu, 'u numinò conti di Gradu.
Murìu a Roma 'ntò 1951.
'A Regioni Siciliana 'ntò 1965 fici fari 'o scultori Bonfigghiu nu beddu monumentu ppi Luigi Rizzu "l'affunnaturi", e 'u fici sistimari 'ntà marina di Milazzu: varda 'u mari 'ntà mossa di lanciarisi, pari chi parra!... No!... Pari chi grida "Viva l'Italia!"
(di Fra Filici)
Nessun commento:
Posta un commento