MENTI RIVULTUSA di Maria Agrippina Amantia

                                        La bravissima poetessa Maria Agrippina Amantia

MENTI RIVULTUSA

Si fimmina, ta stari chiusa!
ma jiu nun la sintia giusta
chista scusa!

Chista è strata ca nun spunta!
ta stari zitta e ferma,
pezzu di rivultusa!

jiu ccu la testa dura di carusa
m'impuntava e facia sempiri,
a figghia mpignusa.

Pigghiti augghia e dijtala,
minti toppi, cusi linzola,
sempri cu dda litania,
matina e sira, tutti contra a mia.

JIu quannu crisciu,
fazzu vintun'annu
sula minni fuiju
ppi lu munnu!

M'arriva n'a ngiafarata!,
manu e cincu jita di me nanna,
na facci stampata!

Chissa è strata ca nun spunta!
leviti i pantaluna, fai l'educata
allonga sta gonna,
nun pigghiari mala strata!

Tu si fimmina, certi cosi,
nun li pò fari,
lu masculu cumanna
tu sutta c'ha stari!

Pirchi? chi c'hannu li masculi
superchiu di mia?
mintitimi alla prova,
ca vi rumpu l'ova!

Silenziu,ta stari! ca ni disonuri
lu dicu a to patri, ca ssa mennula
nun ti voli quagghiari!

Riuordati ca si renni cuntu
sempiri,prima alli genti,
poi,o Padruni di lu munnu.

Mai! jiu lu sacciu,
ca chiddu ca fazzu, nun è piccatu!
pirchì se sugnu fimmina,
hajiu jiditu isatu?

Haiu l'occhi ppi taliari,
a ucca ppi parrari,
u me ciriveddu fazzu funziunari.

Passarru l'anni,fici rivoluzioni,
misi li sciuri dintra li cannuni,
m'alluntanai di l'ipocrisia,
scrivu d'amuri e di puisia

maria agrippina amantia