POESIA SICILIANA di Giuseppe Scammacca

CU D'INVIDIA CAMPA...

Veru... La 'm'miria nascivu ccu lu munnu.
Cainu fu'm'miriusu di so frati
appuntu tali, ca agghicò allu funnu

e l'ammazzò 'ntra l'erba di li prati.
La 'm'miria arristavu ppi cuntornu
tra l'umanità e 'ntra li piccati.

Oggi la 'm'miria è 'na cosa naturali
a culazioni, a pranzu, a cena,
si pigghia a d'dosi ppi midicinali.

Li 'm'miriusi a mia mi fannu pena
qualunque sia lu statu suciali...
Non vali priricari, sicca a lena.

Lu vecchiu si 'm'miria di lu carusu,
lu bruttu si 'mm'iria di chiddi beddi,
lu fissa si 'm'miria ddo' maliziusu

av'voti u riccu di li puvireddi,
e' na rota ca gira 'nta lu fusu,
macina, macina i ciriveddi.

E sta vecchia parabbula ca usu,
dici: Si la 'm'miria fussi vaddira
lu munnu fussi tuttu vaddarusu.

Giuseppe Scammacca (da Senza pritisi)