Anticamenti di rologgi cci n'erunu picca e nenti: chiddu da Matrici o ddu Casteddu, e qualchi rologgiu a pénnulu 'nté casi nobili. 'A genti ppi sapiri l'ura vardava 'u suli e misurava l'umbra, o tintava 'i 'scutari 'u sonu dde' campani. 'A missa 'u Santu curispunneva all'11, ca di duminica e ppe' festi cumannati 'u patri pàrrucu ddu' missi puteva diri: una chidda duminicali all'8, e una prima di cilibrari 'u Santu dda' jurnata, ed era all'11. 'A prima era a missa dde' devoti di tutti i matinati, l'autra era a missa dda genti cchiù comuda ca jeva 'n chiesa sulu a duminica: i nobili, i ziti, i travagghiatura e i campagnoli azzizzati 'i festa. "Nni videmu à missa 'u Santu" era comu dari 'n appuntamentu a trasuta o a nisciuta da chiesa, o puramenti un appuntamentu versu chidd'ura.
L'ancilu era 'n'àutra ura ben precisa, menzujornu. "All'Ancilu cci calu a pasta!" era l'avvertimentu dde' matri di famigghia chi, quannu sunava a campana ddo' menzijornu, calava a pasta sapennu chi maritu e figghi si ricugghievunu a casa a manciari.
A vintun'ura sunava 'na campana, e i picciriddi manciavunu qualchi cosa ('a merendina). Ma era un'ura ca cadeva tra menzujornu e sira e si chiamava vintun'ura cuntannu a una a una di quannu a sira avanti aveva cuddatu 'u suli; quasi quasi currispunneva all'ura nona (9 uri dopu i 6 'i matinu, tri uri dopu menzujornu).
All'Avimaria sunava 'a campana ddo' vespru, da scurata: a cuddata 'u suli si livava manu 'i travagghiari, si turnava a casa unni i fimmini, ditti i santi 'razioni, addumavanu 'u focu e priparavanu 'u cottu.
Cumpieta sunava a tri uri 'i notti, chi si dicevunu l'ultimi prjieri dda' jurnata, prima di jiri a dòrmiri.
E l'uri si cuntavanu a una a una calculannu approsivativamenti: a un'ura 'i notti, a du' uri 'i notti... finu a arrivari "à cantata ddo' jaddu" all'alba; e poi si 'ccuminzava: a un'ura i jornu (e a campana sunava matutinu) a du' uri 'i jornu...
Di paisi a paisi, quasi a stissa usanza, sulu di diversu u nomu o u mutivi di quarchi campaniata, o a secunnu si sunava a campana nica o a campana 'ranni (chi puru avevunu u so' nomi), a campana ddo' casteddu, a campana 'i San Roccu. o chidda dda' Matrici, a campanella dde' Monaci ddo' Cunventu; ma tannu 'a vita d'un paisi era vita di famigghia 'ntà quattru casi.
Nessun commento:
Posta un commento