A FESTA RI SANT'AITA

A FESTA RI SANT'AITA
*************************
Nun c’è ventu, nun c’è acqua, nè bufera nè timpesta
casca u munnu, ma a Frivaru ogni annu si fa festa.
Si fa festa alla Patruna di Catania, virginedda…
marturiata fin'a morti, sposa a Diu, nobili e bedda.
Fu Quinzianu, pritinnenti, ca ppi raggia e ppi dispettu
s’accanì senza ritegnu finu a scipparicci lu pettu.
E patì supplizzi, peni e ogni sorti di tortura
finu all’ultimu so ciatu, ma ristò divota e pura.
Alla morti di la Santa, la città si ‘nginucchiava
e lu focu di la lava sutta 'n-velu…s’arristava.
E accussì annu ppi annu, nun c’è ventu nè timpesta
in onuri di la Santa a Catania si fa festa.
Tutti appressu alla Santuzza, Prisidenti e Cardinali
acchianata ri San Giulianu, Culliggiati, Cattittrali…
la Carrozza ‘do Sinatu ccu li primi cittadini
Cannalori ca’ 'nnacata…Quattru canti…i Cappuccini
Li divoti tutti 'n fila…giuvineddi, nichi e ranni
ca trascinunu la vara…e t’arrizzunu li carni,
ccu li sacchi tutti janchi, tira tira lu curduni
c’è cu ‘nvoca la Santuzza…c’è cu striscia a ginucchiuni.
E lu coru a li Clarissi…e lu Duomu…e li sunati…
e li viali…e li traversi…comu stiddi alluminati.
Bancarelli cu turruni, cosi duci, cassateddi…
appustati strati strati, gnuni, viculi e vaneddi…
comu voli a tradizioni…e sarà sempri accussì…
la sparata di li bummi chiazza Burgu…e, a sira o tri!
Nun c’è ventu, nun c’è acqua, nè bufera, nè timpesta
casca u munnu, m'a Catania pi Sant'Aita si fa festa.
Lu splinnuri di la Santa, l’emozioni di la genti
comu n’ecu ca cuntaggia tutti i cincu cuntinenti.
Emigranti di luntanu…janchi, niuri, longhi e cutti
arrispunnunu cchiù forti…semu tutti divoti tutti…
Ma ‘na vuci tra la fudda…si fa largu e acchiana jauta…
è la vuci di Catania: Cittadiniiiii….Evviva Sant’Aita!!!

di Francesca Privitera
Tratta dalla Silloge: " Cchiù luntanu di 'na stidda".