RE DI DINARI
Mi fai pena, tu re di dinari
di un puntu cchiù di lu cavaleri
cco' dui ti fa 'a superchiria
a' sira jucannu all'osteria.
Mi fai pena, tu re di dinari
amatu sulamenti ppé tò beni
ca t'ha taliari sempri i spaddi
e di 'stà vita nun avutu nenti.
Mi fai pena, tu re di dinari
tu dicu senza 'nvidia 'ntò cori
nun è ccu li sordi, e chistu si sà
ca si pò accattari 'a ficilità.
Ppi putiri tirari avanti
ci voli 'u surrisu di la genti
l'amuri dintra 'u tò fuculati
'u capisti oh re di li dinari?
Ci voli anticchia 'i fantasia
pp'aviri 'a vita menu amara
li cosi ca tu nun poi aviri
pirchì si sulu re di li dinari.
Armando Carruba
Nessun commento:
Posta un commento