Quann'erumu picciriddi erumu già sciuti dda' scola, pirchì 'ntò '50 era raru che i fimmini travagghiavunu e, comu giustu, 'e scoli vasci scevumu 'e dudici. Jeva a G.I.L. - no signuruzza, quali fascista? a scola! Binidittu S Pasquali ! ca era in via G. Battista Perasso. Propiu 'e dudici niscevumu tutti in fila per due... ccu jeva a mangiari a rifizioni e ccu a jucari. A rifizioni c'eranu macari matri i famigghia ca pignata ppi putiri purtari u manciari ca ci davunu a casa... Nuautri jucavumu ca palla, a muccia a muccia, acchiappari etc... 'e dudici e menza ni sintevumu chiamari: Turiddu, Carmelu, Saru svinturatu amaru... e n'arricugghievumu a casa... Ma nta' 'stati i bagni o molu S Antoniu, i ranni vicinu 'e gru ittannusi ddo' pileri e nuatri nichi ntè scogghi ddo' lazzarettu a pigghiari ranciu pilusi, pateddi, vuccuna calannu na riti co' pisciteddu attacatu o mazzuna ammucciati ntè cammira d'aria de' bicicletti o mattuna cco' purtusu dde' muratura. Jurnati ca nun tornanu cchiù, a G.I.L. da cchiù di 50 anni nun è scola elementare e nuddu si fa u bagnu 'o molu San Antoniu ma ch'era beddu 'na vota!
Nessun commento:
Posta un commento