GESU’ JOCA CULL’AUTRI PICCIRIDDI
Successi ca Gesù, Giuseppi e Maria ristaru
in Egittu pi anni e anni doppu ‘a stragi de’ ‘nnuccintuzzi e Gesuzzu jucava
cull’autri picciriddi di ddu’ paisi. E di ‘dda strata unn’era ‘a putjia di
Giuseppi ‘u Palistinisi passò un sacirdoti d’Osiridi e vitti jucari Nofre Gibuz
e Torò cu Gesuzzu Nazzarenu, e ‘i chiamò a parti rimpruvirànnuli, can un si
joca cu carusi d’àutra riligioni, ca ‘u diu Osiridi “Gioia dill’occhiu” s’ascura
e leva ‘a vista ill’occhi a chiddi ca ci mancanu ‘i rispettu. ‘Ccussì Nofre
Gibuz e Torò nun jucaru cchiù ccu’ Gesù. E si fici ‘u tempu ca Gesù, Giuseppi e
Maria riturnaru in Palistina a Nazzaretti; e dda’ Giuseppi travagghiava, ‘u
figghiu crisceva e Maria ‘i drurijava. Gesuzzu cull’autri carusi jucava, e c’era
puru Giuda ‘u figghiu d’u’ fuggiaru, Giuvanni ‘u figghiu do’ tavirnaru e
Giacumu ‘u figghiu du’ sciccaru; e ad iddi Maria ‘i chiamava e ci dava ‘u viscottu
cco’ meli, chi a Gesuzzu tantu ci piaceva. Jucavanu ‘nyà strata o ‘ntà chiazza
i picciriddi, ora a ‘mmucciatedda, ora a latri e vardia, e Giuda sempri vuleva
fari ‘a vardia cu tutti i scusi e cu tutti i scaciuni sempri ‘a vardia chi
vuleva ‘ffirrari Gesuzzu. Stortu e
prisuntusu era Giuda chi, quannu Gesù ‘mpastava crita e faceva aciduzzi e ci
ciusciava ‘i supra e ‘i faceva vulari, ristava maravigghiatu e puru iddu l’avissi
vulutu fari; e siccomu nun cci rinisceva si vinnicava chi a Gesuzzu cci ‘i
sfasciava e cci ‘i rumpeva manu manu ch’iddu i faceva. Ma Gesù, dopu a prima, ‘a
secunna e ‘n’autra vota non ci desi tempu, e appena fattu ‘n aciduzzu cci
ciatava e ‘u faceva vulari. E l’aceddi vulavanu ppi l’aria e poi turnavanu e si
pusavanu supra ‘a testa i spaddi e supra i manu di Gesù, di Giacumu o di
Giuvanni chi battevunu i manu, e mai supra a testa i Giuda ricciutu e
sturtuliddu chi vardava ‘ncagnatu. Chi puru iddu l’avissi vulutu fari e avìa ‘nvidia.
E cci dissi Gesù: “Pigghia a crita e ‘mpasta puru tu, Giuda… videmu chi fai !”
E Giuda ‘mpastò a crita, e inveci d’aciduzzu fici comu un suliceddu, e Gesù cci
ciusciò e ddu suliceddu misi l’ali… e vulò ‘na taddarita! Ca Diu Patri dissi: “L’opiri
boni di mani santi e ‘a ficara fa fica duci, nun pà ‘u nucipéssicu fari dàttuli”.
Nessun commento:
Posta un commento